ව්‍යාපාරික මොහොමඩ් ශියාම් ඝාතනය පිලිබඳ පැමිණිල්ල කැඳවූ අවස්ථාවේ රහස් පොලිසිය අධිකරණයට පවසා සිටියේ සිද්ධිය සම්බන්ධයෙන් හිටපු නියෝජ්‍ය පොලිස්පතිවරයාගේ පුත් රවිඳු ගුණවර්ධනට එරෙහිව ද ප්‍රමාණවත් සාක්ෂි අනාවරණය වී තිබෙන බැවින් ඔහු ද මෙම නඩුවේ සැකකරුවෙකු බවයි.

ඔහු අත් අඩංගුවට ගැනීම පිණිස ඔහුගේ නිවසට ගිය අවස්ථා තුනේදීම, සැකකරුගේ මව සිය රාජකාරියට බාධා කළ බව පොලීසිය අධිකරණයට දැනුම් දුන්නේය.
සිද්ධියට අදාලව රහස් පොලිසිය විසින් ත්‍රස්තවාදය වැළැක්වීමේ පනත සහ අපරාධ නඩු විධාන සංග්‍රහය යන පනත් දෙකම යොදා ගැනීම නීති විරෝධී බවට චෝදනා කල විත්තියේ නීතීඥයෝ, පරීක්‍ෂණ සඳහා අවශ්‍ය නම් සැකකාර රවිඳු ගුණවර්ධන අධිකරණය වෙත ඉදිරිපත් කිරීමට සූදානම් බව ප්‍රකාශ කළහ.
වාස් ගුණවර්ධනගේ නායකත්වයෙන් යුත් පොලිස් කණ්ඩායමක් 2009 වසරේදී තම පුතු පැහැර ගෙන ගොස් ඝාතනය කල බවට එහි පැමිණ සිටි කාන්තාවක් හදිසියේම කෑගසන්නට වීමත් සමඟම නඩු විභාගය අවසානයේදී අධිකරණ භූමිය තුල උණුසුම් වාතාවරණයක් හට ගත්තේය.
අදාළ නඩුව ලබන 19 වන දින නැවත කැඳවීමට තීරණය කල අධිකරණය, එදිනට කවර පනතක් යටතේ මෙම නඩු විභාගය පවත්වන්නේ දැයි අධිකරණය දැනුවත් කරන ලෙස රහස් පොලිසියට නියෝග කළේය.