දෙමටගොඩ දුම්රිය අංගනයේ සිට
රත්මලාන දෙසට රියදුරෙකු නොමැතිව දුම්රිය එංජිමක් ධාවනය වූයේ හොල්මනක් නිසා
නොව එම ධාවනාගාරයේ එදින සේවය කළ රියදුරාගේ බරපතළ අත් වැරදීමකින් බව
ප්‍රවාහන අමාත්‍ය කුමාර වෙල්ගම ප්‍රකාශ කරයි.
අදාල සිදුවීම විමර්ශනයට පත් කළ ත්‍රි පුද්ගල කමිටු වාර්තාව සම්බන්ධයෙන් මාධ්‍යයට අදහස් දක්වමිනුයි ඇමතිවරයා එම අදහස් පළ කළේ.කමිටු වාර්තාව මාධ්‍යයට ඉදිරිපත් කරමින්, ත්‍රි පුද්ගල විමර්ශන කමිටුවේ සාමාජිකයකු වන නියෝජ්‍ය ගමනාගමන අදිකාරී, ඒ.ඩී .බී සෙනවිරත්න ප්‍රකාශ කළේ, රියදුරෙකු නොමැතිව දුම්රිය එංජිම ධාවනය වීම කඩාකප්පල්කාරී ක්‍රියාවක් නොවන බවයි.
" එම දුම්රිය එන්ජිම දුම්රිය අංගනයෙන් එලියට යාම සම්බන්ධයෙන් ඒ වෙලාවේ සේවය කරපු රියදුරු මහතාත් සහායක රියදුරු මහතාත් සම්පුර්ණයෙන් ම වගකිවයුතුයි, එම දෙදෙනාගේ අතපසු වීම් සහ නො සැලකිල්ල නිසයි, මෙය සිදු වී තිබෙන්නේ." නියෝජ්‍ය ගමනාගමන අධිකාරීවරයා පවසයි.
CCTV සාක්‍ෂි
කමිටුවේ සාමාජිකයකු වන නියෝජ්‍ය ප්‍රධාන යාන්ත්‍රික ඉංජිනේරු දිලන්ත ප්‍රනාන්දු, අදාළ දුම්රිය එන්ජිම ගමන් කර ඇති ආකාරය මාධ්‍යයට පැහැදිලි කරමින්;
" එන්ජිම රාත්‍රී 12.25 ත් 12.30 අතර වේලාවක පණ ගැන් වී,12.42 මරදාන දුම්රිය ස්ථානයත් 12.55 වෙන කොට කොටුව දුම්රිය ස්ථානයත් පසු කරලා තියෙනවා, උදෑසන 2.17 වන විට ගල්කිස්ස රත්මලාන කර්මාන්ත ශාලාවට ඇතුල් වෙන පාලක සංඥාව පසු කරල තියෙනවා, දුම්රිය එන්ජිම පැයට කිලෝමීටර් 9.5 ක වේගයකින් ගමන් කර තිබෙනවා" යනුවෙන් දුම්රිය එන්ජිමේ ගමන් මග විස්තර කළේය.
රියදුරා දුම්රිය එන්ජිම නතර කිරීමේ දී දුම්රිය ක්ලචය ක්‍රියාන්විත නො කිරීම සහ එන්ජිමක් නතර කිරීමට පෙර සිදු කළ යුතු වායු පීඩන ඉවත් වීමේ ක්‍රියාවලිය අවසන් වීමට පෙර ඔහු දුම්රියෙන් බැස යාම දුම්රිය එන්ජිම ඉබේම ගමන් ගැනීමට හේතු වී ඇතැයි නියෝජ්‍ය ප්‍රධාන යාන්ත්‍රික ඉංජිනේරු දිලන්ත ප්‍රනාන්දු පවසයි.
Post a Comment