බ්‍රිටිෂ් එයාර්වේස් ගුවන් සේවයට අයත් යානයකින් බ්‍රිතාන්‍යය බලා පියාසර කරමින් සිටියදී වැසිකිලියේ දොර බව සිතා එම ක්‍රීඩකයා යානයේ දොරටුව විවෘත කිරීමට උත්සාහ කළ අවස්ථාවේ යානයේ මගීන් තැතිගැනුණු බව ලන්ඩනයේ පළ වන ඩේලි මේල් පත්‍රය වාර්තා කොට තිබිණ.
සිද්ධිය පිළිබඳව කණ්ඩායමේ කළමනාකරු ජයන්ත සෙනවිරත්න තමන්ට වාර්තාවක් භාර දුන් බව පවසන ශ්‍රී ලංකා ක්‍රිකට් ආයතනය, ජුනි 30 වැනි දින මධ්‍යම රාත්‍රියේ රමිත් රඹුක්වැල්ල ගුවන් යානයේ වැසිකිලිය භාවිත කිරීමට තැත් කළ අවස්ථාවේ යානයේ තිබූ මඳ ආලෝකය හේතුවෙන් ඔහු වැසිකිලියේ දොර වෙනුවට යානයේ දොර විවෘත කිරීමට උත්සාහ කළැයි වාර්තාවේ සඳහන් වන බවත් ප්‍රකාශ කරයි.
ඒ පිළිබඳව බීබීසීයට අදහස් දැක්වූ බ්‍රිටිෂ් එයාර්වේස් ගුවන් සේවයේ ප්‍රකාශකයෙක්, සිදුවීම සනාථ කළ අතර ගුවන් මගියා බීමත්ව සිටි බව තම විශ්වාසය බව ද සඳහන් කළේය.
සිදුවීම නිසා ගුවන් යානයේ ආරක්ෂාව සම්බන්ධයෙන් ගැටලුවක් මතු නොවූ බව පැවසූ ගුවන් සේවයේ ප්‍රකාශකයා, මගියාගේ නම හෝ ජාතිකත්වය හෙළි කිරීම ප්‍රතික්ෂේප කළේය.
අදාළ චෝදනාවට රමිත් රඹුක්වැල්ල වරදකරු වුවහොත් ඔහුට එරෙහිව විනය පියවර ගන්නා බවයි ශ්‍රී ලංකා ක්‍රිකට් ආයතනය නිකුත් කළ නිවේදනයේ වැඩිදුරටත් සඳහන් වෙන්නේ.
සිද්ධිය පිළිබඳව වැඩිදුර කරුණු විමසීම පිණිස ශ්‍රී ලංකා ක්‍රිකට් බලධාරීන් ඇමතීමට බීබීසී සංදේශය දැරූ උත්සාහය සාර්ථක නොවීය.